Quia per primi lapsum parentis genus humanum labile et pronum est ad peccandum, Omnipotentis gratia post baptismi donum aliud etiam genus suis fidelibus concessit, quo ad misericordiam pervenire consequendam possint animarum redemptionem, videlicet helemosinarum largitionem. Quocirca ab eo precepta dantur, ut quotquot volumus regna nobis reddi perdita, statuamus nobis amicos de Mamona, dantesque temporalia mansura perhennis vitæ precipiamus ęterna. Ideoque ego Blismodis reminiscens multiplices excessus mundanę conversationis, assentientibus filiis et amicis meis, dono Domino Deo et beatis ejus apostolis Petro et Paulo et loco Cluniacensi, in eorum veneratione dedicato apostolorum, aliquit de jure meę hereditatis in loco beneficii et sepulturę. Est autem unus magnus campus positus in villa quę ad Oblat dicitur, ab omni parte determinatus suis finibus et concisis fruticum diversarum arborum. Deforis autem circumdatur a parte una publica via, ab alia parte vineis, a tercia villa supradicta. Si quis vero hoc destruere voluerit vel inquietare donum, fiat anathema maranatha. S. Blismodis, quę donum hoc fecit et rogavit firmare. S. Artaldi, [et] Gaufredi filiorum ejus, qui hoc laudaverunt et firmaverunt.